(ژباړه)

رسول الله صلی الله علیه وسلم خپل امت د شپې قیام ته تشویق کړی؛ دلیل یې هغه فضایل، خیراتونه، برکتونه او رحمتونه دي، چې په هغه کې نغښتي دي. د شپې قیام د دعاګانو د قبلېدو، د اړتیاوو د پوره کېدو، د نارغیو د له منځه تلو او د ښېګڼو او کرامتونو د دروازو د پرانیستو لامل کېږي...

له مغیره بن شعبه رضي الله عنه څخه نقل شوی، چې فرمایي:

«قام النبي حتى تورمت قدماه، فقيل له: قد غفر الله لك ما تقدَّم من ذنبك وما تأخَّر ؟ قال : «أفلا أكون عبدًا شكورًا!» (رواه البخاري او مسلم او النسائي)

ژباړه: رسول الله صلی الله علیه وسلم د شپې دومره قيام وکړ، چې مبارکې پښې يې وپړسېدلې. يو چا ورته وويل: الله سبحانه وتعالی ستاسو تېر او راتلونکي ټول ګناهونه بښلي دي، رسول الله صلی الله علیه وسلم په ځواب کې وایي؛ ایا د الله شکر کوونکی بنده نه شم؟!

له ابو هریره رضي الله عنه څخه نقل شوی، چې رسول الله صلی الله علیه وسلم فرمایي:

«أفضل الصيام بعد رمضان شهر الله المُحرَّم، وأفضل الصلاة بعد الفريضة صلاة الليل» (رواه مسلم وأبو داود، والترمذي، والنسائي وابن خزيمة في صحيحه(

ژباړه: تر ټولو غوره روژه له رمضان میاشت وروسته د الله په میاشت (محرم) کې روژه ده او تر ټولو غوره لمونځ له فرض لمانځه وروسته د شپې لمونځ دی.

له عبدالله بن سلام رضي الله څخه نقل شوی، چې فرمایي:

«أول ما قدم رسول الله المدينة، انجفل الناس إليه، فكنتُ فيمَن جاءه، فلما تأملتُ وجهَه، واستبنتُه عرفت أن وجهه ليس بوجه كذَّاب، قال: فكان أول ما سمعتُ من كلامه أن قال: «أيها الناس أفشوا السلام، وأطعموا الطعام، وصلوا الأرحام، وصلُّوا بالليل والناس نيام تدخلوا الجنة بسلام» (رواه الترمذي)

ژباړه: کله چې رسول الله صلی الله علیه وسلم مدینې ته داخل شو، خلک د هغه په لوري راټول شول او زه هم یو له هغو کسانو څخه وم، چې د هغه خوا ته لاړم. کله مې چې د هغه مخ ته وکتل او په دقیق ډول مې تر نظر تېر کړ، نو پوه شوم چې څېره یې د دروغجن نه وه. لومړۍ خبره چې له هغه څخه مې واورېده، دا وه چې ویې فرمایل: «اې خلکو، سلام په خپلو منځو کې خپور کړئ، یو بل ته ډوډۍ ورکړئ، رحمونه وصل کړئ (صله‌رحم وکړئ) او د شپې لخوا لمونځ وکړئ، ځکه دا مهال خلک ویده وي، ترڅو په ارامۍ سره جنت ته داخل شئ.

سعید بن مسیب وایي: «هغه کس چې شپه په ویښه تېروي، الله سبحانه وتعالی یې څېره داسې نوراني کوي، چې هر مسلمان به یې خوښوي. ان هغه کس چې دی به یې لا لیدلی نه وي، خو وایي به: دا کس مې خوښېږي. کله چې له حسن بصري څخه وپوښتل شول: «د هغو کسانو څېرې ولې ډېرې ښایسته وي، چې شپه په ویښه تېروي؟» هغه په ځواب کې وویل: «ځکه هغوی له الله سبحانه وتعالی سره خلوت کوي او الله سبحانه وتعالی په خپل نور سره هغوی ته پوښښ ورکوي.»

له معاذ بن جبل رضي الله عنه څخه روایت دی، چې رسول الله صلی الله علیه وسلم فرمایلي:

«ما من مسلم يبيت طاهرًا، فيتعار من الليل، فيسأل الله خيرًا من أمر الدنيا والآخرة إلا أعطاه الله إياه » (رواه أبو داود، ورواه النسائي، وابن ماجة(

ژباړه: هر مسلمان چې شپه په پاک حالت کې تېره کړي او په شپه کې راپورته شي او له الله سبحانه وتعالی څخه د دنیا او آخرت د مرستې غوښتنه وکړي، نو الله سبحانه وتعالی به یې غوښتنه پرځای کوي.

له جابر رضي الله عنه څخه نقل شوی چې هغه وویل: له رسول الله صلی الله علیه وسلم څخه مې واورېدل چې ویې فرمایل:

«إن في الليل لساعة لا يوافقها رجل مسلم يسأل الله خيرًا من أمر الدنيا والآخرة إلا أعطاه إياه، وذلك كل ليلة» (رواه مسلم)

ژباړه: په شپه کې یو ځانګړی ساعت دی، چې هر مسلمان په هغه ساعت کې له الله سبحانه وتعالی څخه د دنیا او آخرت د مرستې غوښتنه وکړي، الله سبحانه وتعالی حتمي د هغه غوښتنه پوره کوي او دا ساعت په هره شپه کې شته دی.

له عقبه بن عامر رضي الله عنه څخه نقل شوی، چې وایي: له رسول الله صلی الله علیه وسلم څخه مې واورېدل چې ویې فرمایل:

«الرجل من أمتي يقوم من الليل يعالج نفسه إلى الطهور، وعليه عُقَد، فإذا وضَّأ يديه انحلت عقدة، وإذا وضّأ وجهه انحلت عُقدة، وإذا مسح رأسه انحلَّت عُقدة، وإذا وضَّأ رجليه انحلت عقدة، فيقول الله عز وجل للذين وراء الحجاب : انظروا إلى عبدي هذا يُعالج نفسه يسألني، ما سألني عبدي هذا فهو له» (رواه أحمد وابن حبان في صحيحه، واللفظ له)

ژباړه: زما له امت څخه هر کس چې په شپه کې راپورته شي او ځان د اوداسه لپاره چمتو کړي، پر هغه پورې غوټې تړل شوې وي؛ کله چې خپل لاسونه مینځي، یوه غوټه پرانیستل کېږي، کله چې خپل مخ مینځي، بله غوټه پرانیستل کېږي، کله چې خپل سر مسحه کوي، بله غوټه پرانیستل کېږي او کله چې خپلې پښې مینځي، ټولې غوټې یې پرانیستل کېږي. وروسته الله تعالی د پردې تر شا پرښتو ته فرمایي: زما بنده ته وګورئ چې ځان سختۍ ته ورکوي او له ما څخه غوښتنه کوي، نو هغه څه چې زما بنده یې له ما وغواړي، هغه به ورته چمتو وي.

له ابو امامه باهلي رضي الله عنه څخه روایت دی، چې رسول الله صلی الله علیه وسلم فرمایي:

«عليكم بقيام الليل؛ فإنه دأب الصالحين قبلكم، وقُربة إلى ربكم ومكفرة للسيئات ومنهاة عن الإثم» (رواه الترمذي)

ژباړه: پر تاسو د شپې قیام دی (د شپې د قیام لپاره بېړه وکړئ)؛ ځکه دا عمل له تاسو وړاندې د نېکو خلکو تګلاره وه او ستاسو رب ته د نږدې کېدو، د ګناهونو د کفارې او له ګناه څخه د ګرځېدو وسیله ده. 

له عبدالله بن عمرو بن عاص رضي الله عنهما څخه روایت دی، چې رسول الله صلی الله علیه وسلم فرمایي:

«أحب الصلاة إلى الله صلاة داود، وأحب الصيام إلى الله صيام داود؛ كان ينام نصف الليل، ويقوم ثلثه، وينام شدسه، ويصوم يومًا، ويُفطر يومًا» (رواه البخاري ومسلم وأبو داود، والنسائي، وابن ماجة)

ژباړه: د الله سبحانه وتعالی په نزد تر ټولو غوره لمونځ د داود علیه‌السلام لمونځ دی او د الله سبحانه وتعالی په نزد تر ټولو غوره روژه د دواد علیه‌السلام روژه ده. هغه به د شپې تر نیمایي ویده کېده، د شپې یو پر درېیمه برخه کې به یې قیام کاوه او وروسته د شپې یو پر شپږمه برخه کې به ویده کېده. هغه به یوه ورځ روژه نیوله او یوه ورځ به یې روژه ماتوله.

له ابو هریره او ابو سعید رضي الله عنهما څخه روایت دی، چې رسول الله صلی الله علیه وسلم فرمایي:

«إذا أيقظ الرجل أهله من الليل فصليا، أو صلى ركعتين جميعًا، كُتبا في الذاكرين والذاكرات» (رواه أبو داود)

ژباړه: هر کله چې یو کس د شپې مهال خپله مېرمن راویښه کړي او دواړه لمونځ وکړي یا هر یو دوه رکعته لمونځ وکړي، د ذکر ویونکو نارینه او ښځو په ډله کې به وشمېرل شي.

له سهل بن سعد رضي الله عنهما څخه نقل شوی دی، چې وایي:

جاء جبريل إلى النبي صلى الله عليه وسلم فقال: «یا محمد، عش ما شئت فإنك ميت، واعمل ما شئتَ فإنك مجزي به، وأحبب من شئت فإنك مفارقه، واعلم أن شرف المؤمن قيام الليل، وعزّه استغناؤه عن الناس» (رواه الطبراني في الأوسط)

ژباړه: رسول الله صلی الله علیه وسلم ته جبراییل راغی او ویې ویل: «اې محمد! هر څومره چې غواړې ژوند وکړه، خو پوه شه چې په پای کې به وفات کېږې؛ هر څومره چې غواړې عمل وکړه، خو پوه شه چې د هغه پر اساس به جزا درکول کېږي؛ له هر چا سره چې دوستي غواړې، خو پوه شه چې له هغه څخه به بېل شې او پوه شه چې د مومن شرف د شپې په قیام کې او عزت یې له خلکو څخه په بې‌نیازۍ کې دی.

له ابن عباس رضي الله عنهما څخه روایت دی، چې رسول الله صلی الله علیه وسلم وفرمایل:

«أشرافُ أمتي حملة القرآن، وأصحاب الليل» (رواه ابن أبي الدنيا، والبيهقي(

ژباړه: زما د امت تر ټولو شریف خلک د قرآن لېږدوونکي او د شپې ویښ پاتې کېدونکي دي.

له ابو درداء رضي الله عنه څخه روایت دی، چې رسول الله صلی الله علیه وسلم وفرمایل:

«ثلاثة يُحبُّهم الله ويضحك إليهم، ويستبشر بهم: الذي إذا انكشفت فئة قاتل وراءها بنفسه لله عز وجل: فإما أن يُقتل، وإما أن ينصره الله عز وجل ويكفيه، فيقول: انظروا إلى عبدي هذا كيف صبر لي بنفسه؟ والذي له امرأة حسنة، وفراش لين حسن، فيقوم من الليل، فيقول: يذَرُ شَهوته ويذكرني، ولو شاء رقد. والذي إذا كان في سفر، وكان معه ،ركَب فسَهِروا، ثم هجعوا فقام من السحر في ضراء وسراء» (رواه الطبراني في الكبير بإسناد حسن(

ژباړه: دری ډلې دي چې الله سبحانه وتعالی یې خوښوي او هغوی ته خاندي او له هغوی څخه خوشاله کېږي: کله چې د اسلام پوځ ماته خوري، خو یو کس په دغه حالت کې د جګړې پر ډګر ځان الله تعالی ته سپاري؛ یعنې دا چې یا به ووژل شي او یا به الله تعالی هغه بریالی او خوندي کړي او الله تعالی فرمایي: زما بنده ته وګورئ چې څه ډول زما لپاره صبر کوي. یو څوک چې ښایسته مېرمن او نرم تخت لري، خو بیا هم د شپې له خوب څخه ویښېږي او وایي: خپل شهوت او ارامي مې پرېښوده او د الله سبحانه وتعالی په یاد راپورته شوم. یو کس په سفر دی او ملګري یې د شپې له ویښېدو وروسته ویده کېږي، خو هغه سهار وختي په سختۍ یا ارامۍ کې عبادت ته را پورته کېږي.  

له ابن مسعود رضي الله عنه څخه روایت دی، چې رسول الله صلی الله علیه وسلم وفرمایل:

«عجب ربنا تعالى من رجلين: رجل ثار عن وطائه ولحافه من بين أهله وحبه إلى صلاته، فيقول الله جل وعلا: انظروا إلى عبدي، ثار عن فراشه ووطائه من بين حبه وأهله إلى صلاته رغبةً فيما عندي، وشفقة مما عندي، ورجل غزا في سبيل الله، وانهزم أصحابه وعلم ما عليه في الانهزام ، وما له في الرجوع، فرجع حتى يُهريق دمه، فيقول الله: انظروا إلى عبدي، رجع رجاءً فيما عندي، وشفقةً مما عندي، حتى يُهريق دمه» (رواه أحمد)

ژباړه: زموږ رب د دوو کسانو په اړه حیرانېږي: یو هغه کس چې د خپلې کورنۍ او دوستانو په منځ کې له خپلې بسترې څخه د لمانځه لپاره راپورته شي. الله سبحانه وتعالی فرمایي: زما بنده ته وګورئ چې څه ډول له تخت او بسترې څخه د خپلې کورنۍ او دوستانو په منځ کې د لمانځه لپاره راپورته شوی دی، د هغه څه په هیله چې له ما سره دي او د هغه څه له وېرې چې له ما سره دي او بل هغه کس دی چې د الله سبحانه وتعالی په لاره کې جهاد کوي، خو ملګرو یې ماته خوړلې وي؛ نوموړی د ماتې له پایلې څخه خبر وي او د جګړې ډګر ته له بېرته ګرځېدو څخه هم خبر وي، خو هغه بیا هم راګرځي ترڅو وینه یې تویې شي. الله سبحانه وتعالی فرمایي: زما بنده ته وګورئ، د هغه څه په هیله چې له ما سره دي او د هغه څه له وېرې چې له ماسره دي، راوګرځېد چې وینه یې تویې شي.

له عبدالله بن ابي قیس رضي الله عنه څخه نقل شوی، چې عایشې رضي الله عنهما ویلي دي:

«لا تدع قيام الليل؛ فإن رسول الله صلى الله عليه وسلم كان لا يدعه، وكان إذا مرض أو كسل صلى قاعدًا» (رواه أبو داود وابن خزيمة في صحيحه(

ژباړه: د شپې قیام مه پرېږدئ؛ ځکه رسول الله صلی الله علیه وسلم به هېڅکله هغه نه پرېښود او کله به چې ناروغ و او یا به یې د ستړیا احساس کاوه، نو لمونځ به یې په ناسته ادا کاوه.

همدارنګه له عایشې رضي الله عنها څخه روایت دی، چې رسول الله صلی الله علیه وسلم فرمایلي دي:

«ما من امرئ تكون له صلاة بليل، فيغلبه عليها نوم، إلا كتب الله له أجر صلاته وكان نومه عليه صدقة» (رواه مالك، وأبو داود، والنسائي(

ژباړه: څوک چې د شپې مهال هر وخت لمونځ کوي، مګر یو ځل خوب پرې راشي، نو الله سبحانه وتعالی ورته د همغه لمانځه بدله لیکي او خوب یې ورته صدقه ګرځوي.

د الوعې مجلې له ۴۵۸-۴۵۹ شمېرې څخه- نهه دېرشم کال، د ۱۴۴۶هـ.ق کال، ربیع‌الاول-ربیع‌الثاني

چې د ۲۰۲۴م کال له اکټوبر-نومبر سره سمون لري

ژباړن: صهیب منصور

(ژباړه)

خبر:

د انقلابیونو لخوا د سوریې د دکتاتور نظام تر سقوط وروسته، نړیوال پلاوي یو په بل پسې سوریې ته را روان دي.

تبصره:

د شام د انقلاب دیارلس کاله وشول؛ په دې موده کې انقلابیونو د اسد د رژیم د راپرځولو هڅې کولې او د اسلام او اسلام د حاکمیت د تاسیسولو شعارونه یې ورکول. هغه وخت غربي او شرقي هیوادونو د اسد د رژيم ملاتړ کاوه؛ د ده د ملاتړ لپاره له ایران، عراق، روسیې او امریکا څخه پوځونه سوریې ته واستول شول. په دغو دیارلسو کلونو کې په سوریه کې تر یو ملیون زیات مسلمانان شهیدان شول؛ ښارونه یې ویجاړ شول، د سوریې تر لسو ملیونو ډیر خلک د خپلو کورونو پرېښودو ته اړ شول او پر انقلابیونو د ترهګرو ټاپې ووهل شوې.

د اسد د نظام تر سقوط څو ورځې وړاندې هغه په سعودي کې د عرب هیوادونو د مشرانو غونډې ته بلل شوی و او هلته یې هرکلی وشو. امریکا او د نړۍ نورو قدرتونو له هغه سره د اړیکو پراخول غوښتل خو د الله سبحانه و تعالی اراده د دوی د غوښتنې خلاف وه؛ د انقلابیونو جبهې پراخې شوې او د اسد رژیم ناڅاپه راوپرځېد. له دې سره د نړۍ ستر قدرتونه او په سیمه کې د هغوی پیروان ووېرېدل؛ پرلپسې غونډې یې جوړې کړې او بیا یې خپل پلاوي سوریې ته واستول چې انقلابیون د اسلام له حاکمولو راوګرځوي؛ ورته ووایي چې لږکیو ته پام وکړي، د ښځو حقونه په پام کې ونیسي او له یهودي رژیم سره له جګړې ډډه وکړي.

پوښتنه دا ده چې کله په سوریه کې یو ملیون مسلمانان ووژل شول، ملیونونه نور سخت شکنجه او له خپلو مېنو بېځایه شول؛ هغه وخت دا کسان (نړیوال پلاوي) چېرته وو!؟ د ماشومانو نازک بدنونه چې ټوټه ټوټه کېدل او پر ښځو تېری کېده؛ دوی چېرته وو!؟ ایا په ملګرو ملتونو کې د بشار الاسد استازی نه و!؟ ایا وحشي بشار د عرب اتحادیې او د اسلامي همکاریو سازمان غړی نه و!؟ ایا د نړۍ هیوادونو د اسد له رژیم سره په دغو جنایتونو کې مرسته ونه کړه!؟ اوس چې هغه وحشي او ظالم رژیم راوپرځېد، نړیوال پلاوي راځي. هغه جنایتونه غندي او د شکنجو د کیسو په لیدو او اورېدو حیرانېږي!

اې مسلمانانو! بشار الاسد او د هغه جنایتکار رژیم ستاسو د وژلو، شکنجې او بېځایه کولو لپاره د سترو قدرتونو یوه وسیله وه؛ دا نړیوال پلاوي ستاسو اصلي دښمنان دي؛ نو اوس چې ستاسو صفت کوي او د راپرځېدلي وحشي نظام بد وايي، په خبرو یې مه تېروځئ! له دوی څخه د خیر هیڅ تمه مه کوئ او هغه څه وکړئ چې الله سبحانه و تعالی یې امر درته کړی. د الله سبحانه و تعالی له مخلصو بندګانو سره یو ځای شئ؛ دښمن ته نرمي مه ښيئ او باور مه پرې کوئ؛ ځکه دا کار د الله سبحانه و تعالی د غضب او خشم سبب کېږي او ستاسو قربانۍ په اوبو لاهو کوي! موږ د یوې سترې بریا په درشل کې یو؛ نو د اسلام د حاکمیت لپاره د الله سبحانه و تعالی د امر په پلي کولو کې ثابت قدم او متعهد اوسئ او په خپلو عملونو کې صداقت او اخلاص وښيئ.

لیکوال: شیخ ډاکتر محمد ابراهیم

د حزب التحریر – ولایه لبنان د مطبوعاتي دفتر رییس

(ژباړه)

حزب‌التحریرـ ولایه سوډان د ۲۰۲۴م کال، د ډسمبر په ۲۳مه د دوشنبې په ورځ د پورټ سوډان د مرکزي بازار په زړه کې د "خلافت د اسلام حکومتي نظام دی" تر سرلیک لاندې یوه سیاسي وینا وکړه. دغه وینا د حزب‌التحریر غړي، استاد یعقوب ابراهیم وړاندې کړه. نوموړي په خپله وینا کې څرګنده کړه چې الله سبحانه وتعالی پر مسلمانانو لازمه کړې چې د اسلام احکام تطبیق کړي او د خپل ژوند په ټولو برخو کې یې په عملي توګه تنظیم کړي. هغه وضاحت ورکړ چې دغه تطبیق د یوه شرعي بیعت له لارې له هغه خلیفه سره کیږي چې دین اقامه کوي او نړۍ ته یې رسوي.

نوموړي د خلافت پر وجوب او د بیا تاسیس لپاره یې د امت د کار کولو پر اړتیا ټینگار وکړ او په دې اړه یې له قرآن او سنتو څو نصوص وړاندې کړل، لکه د الله سبحانه وتعالی دغه قول:

(وَأَنِ احْكُم بَيْنَهُم بِمَا أَنزَلَ اللهُ وَلَا تَتَّبِعْ أَهْوَاءَهُمْ وَاحْذَرْهُمْ أَن يَفْتِنُوكَ عَن بَعْضِ مَا أَنزَلَ اللهُ إِلَيْكَ فَإِن تَوَلَّوْا فَاعْلَمْ أَنَّمَا يُرِيدُ اللهُ أَن يُصِيبَهُم بِبَعْضِ ذُنُوبِهِمْ وَإِنَّ كَثِيرًا مِّنَ النَّاسِ لَفَاسِقُونَ) [مائده: ۴۹]

ژباړه: «نو اې محمده صلی الله علیه وسلم! د دوی ترمنځ په هغه څه حکم وکړه چې الله سبحانه وتعالی پر تا نازل کړي دي، د دوی د غوښتنو پیروي مه کوه او پام دې وي چې دغه خلک تا په فتنه کې وانه چوي، له هغه هدایت څخه چې الله سبحانه وتعالی تا ته درلېږلی د یوې ذرې په اندازه دې هم وانه ړوي. نو که دوی مخ ورڅخه واړوي وپوهېږه، چې الله سبحانه وتعالی د دوی د ځینو ګناهونو په سبب په مجازاتو د هغوی د اخته کېدو اراده کړې ده او دا حقیقت دی چې له دغو خلکو څخه ډېری یې فاسقان دي.»

او د عبدالله بن عمر رضي الله عنه حديث چې بخاري نقل کړی، چې رسول الله صلی الله علیه وسلم وفرمایل:

«وَمَنْ مَاتَ وَلَيْسَ فِي عُنُقِهِ بَيْعَةٌ مَاتَ مِيتَةً جَاهِلِيَّةً»

ژباړه: څوک چې مړ شي او پر غاړه یې د بیعت کړۍ نه وي، د جاهلیت په مرګ مړ شوی دی.

نوموړي دا هم په ډاګه کړه چې د نن ورځې حکومتي نظامونه، لکه سیکولر ډیموکراتیک، ملکي یا نظامي دولتونه، له اسلام سره په ټکر کې دي. هغه څرګنده کړه چې دغه ټول نظامونه د استعماري قدرتونو زاړه محصولات دي.

په پای کې، هغه د غونډې له ګډونوالو او ټول اسلامي امت څخه وغوښتل چې د دغه ستر فرض، یعنې د نبوت پر منهج د دویم راشده خلافت د تاسيس لپاره هڅې وکړي.

حاضرینو له دغې وینا سره په قوي او مثبت ډول تعامل وکړ، خپله خوښي، خوشبیني، د تکبیر نعرې او ستاینې یې څرګندې کړې. ځینو خو ان په پای کې غوښتنه وکړه چې دا مهمه وینا دې پای ته نه رسېږي.

ابراهیم عثمان (ابو خلیل)

د حزب‌التحریرـ ولایه سوډان مطبوعاتي دفتر ویاند

۱۴۴۶ هـ.ق کال، د جمادي الثاني ۲۲مه

۲۰۲۴م کال، د ډسمبر ۲۴مه

د صدور ګڼه: ۳۸/ ۱۴۴۶

ژباړن: اسرار تکل

(ژباړه)

خبر:

د ۲۱ عربي خبري آژانس «پر اردن د اسراییلو د برید د احتمال په اړه د نظام د بدلون په حالت کې د ټرمپ او نتانیاهو خبرې» تر سرلیک لاندې خبر خپور کړ؛ په خبر کې راغلي چې د تل‌ابیب پوهنتون څېړونکي «یشوع مئیري» ویلي، چې د امریکا ولسمشر ډونالډ ټرمپ د اسراییلو له لومړي وزیر بنیامین نتانیاهو سره په خپلو وروستیو خبرو کې ټینګار کړی، چې اسراییل باید په اردن کې د اسلامي کودتا د رامنځته کېدو په صورت کې پر دغه هېواد باندې احتمالي برید ته چمتو وي.

همدارنګه هغه په ټولنیزه رسنۍ، اېکس کې لیکلي: ټرمپ او نتانیاهو د سیمې سیاسي وضعیت ارزولی او دې پایلې ته رسېدلي دي، چې ایران ښايي په سوریه او لبنان کې له ماتو وروسته هڅه وکړي، چې په اردن کې خپل نفوذ پراخ کړي.

تبصره:

امریکا فکر کوي چې مسلمانان د «ایران ګواښ» په اړه د دوی کیسې او هغه هڅې چې د مذهبي نفوذ د پراختیا لپاره یې کوي، مني. خو پر دې نه پوهېږي چې په غزه کې د یهودي رژيم وحشتونو د ایران او په لبنان کې د هغه د حزب اصلي څېره بربنډه کړې ده او د ایران هغه ادعاوې تشې خبرې دي، چې د قدس د ازادۍ او له صهیونیستي رژیم سره د دښمنۍ په اړه یې کوي؛ دوی په حقیقت کې د یهودي اشغالګر رژیم په ګټه عمل کوي او دغه شعارونه په سیمه کې د امریکا د مداخلو او اشغال لپاره پوښښ او دلیل دی.

یهودي رژیم د مسلمانانو په خاورو کې د غرب نظامي اډه ده، چې د عرب حاکمانو په مرسته رامنځته شوې ده، ترڅو د مسلمانانو په ستوني کې اغزی پاتې شي، د مسلمانانو تر منځ اختلافات زیات کړي، د هغوی سرچینې لوټ کړي او د غربي قدرتونو غوښتنې پر ځای کړي. امریکا یو ځل بیا ایران د سیمې لپاره یو ګواښ معرفي کوي، ترڅو د سوریې د وضعیت او پر اردن یې د اغېز په اړه خپلې اندېښنې توجیه کړي، په داسې حال کې چې د جولاني په مشرۍ سوري مخالفینو غربي هېوادونو ته ویلي، چې له نورو هېوادونو په ځانګړې توګه یهودي دولت سره د جګړې هېڅ نیت نه لري او سوریه به یوازې د سایکس-پیکو په واسطه ترسیم شوې پولې ساتي او له ګاونډیو هېوادونو سره به خپلو اړیکو ته دوام ورکوي.

مسله تر دې هم لویه شوې او د شرم وړ کچې ته رسېدلې؛ ځکه د روسیې د هوایي اډې «حمیمیم» چې د سوریې د خلکو د وژلو لپاره الوتکې ترې پورته کېدې، او نورو امریکایي اډو ساتنه لا دوام لري. خو بیا هم دا مسایل نه دي توانېدلي، چې د اسلامي دولت له تاسیس څخه د غرب وېره را کمه کړي؛ ځکه ویده زمری راویښ شوی او قدرت یې ورځ تر بلې زیاتېږي. مسلمانان دې پایلې ته رسېدلي دي، چې کافر غرب هېڅکله د دوی د خیر او اصلاح فکر نه کوي او د اردن حاکم حس کړې، چې پای یې نږدې شوی او د خطر زنګ وهل شوی دی. د اردن زندانونه هم د نورو عربي هېوادونو په څېر له هغو کسانو ډک دي، چې د حق غږ یې اوچت کړی او حکومت هغوی زندان ته اچولي دي چې د خلکو غږ چوپ کړي.

هو، د صبر کاسه ډکه شوې ده او د اردن د حکامو خیانت نور له هېڅ مسلمان څخه پټ نه دی، خو لکه څنګه چې رسول الله صلی الله علیه وسلم فرمایلي دي:

«لَا تَزَالُ طَائِفَةٌ مِنْ أُمَّتِي ظَاهِرِينَ عَلَى الْحَقِّ، لَا يَضُرُّهُمْ مَنْ خَذَلَهُمْ، حَتَّى يَأْتِيَ أَمْرُ اللهِ وَهُمْ كَذَلِكَ»

ژباړه: زما له امت څخه به تل یوه ډله پر حق وي او هېڅ شی هغوی له دې لارې نشي راګرځولی، ان که نور خلک هغوی پرېږدي، تر دې چې د الله سبحانه وتعالی امر راورسېږي او هغوی به په همدغه حال وي.

د اتلولۍ هغه فردي عملیات چې ځینو مسلمانانو د اردن پر پوله د یهودي دولت پر وړاندې ترسره کړل، موږ ته دا ثابتوي چې د اردن طاغوتي نظام خلک نه مني او پولې یې تش خیال دی. مسلمانان یوې اسلامي رهبرۍ ته په تمه دي چې د حاکمانو تاج او تخت نسکور کړي او ورپسې د قدس د ازادۍ لپاره قیام وکړي.

امریکا په وېره وضعیت څاري او هڅه کوي چې په سوریه کې د مسلمانانو انقلابي غبرګونونه محدود کړي او د هغوی لوړې موخې د یوه کوچني او کمزوري دولت په رامنځته کولو سره راټیټې کړي. همدارنګه امریکا له راتلونکي څخه د وېرې په سبب له عرب حاکمانو سره د پټو ناستو له لارې د داسې پلان د تپلو هڅه کوي چې د اسلام د طوفان پر وړاندې مقاومت وکړي. د عقبې په ناسته کې د اردن حکومت ټینګار وکړ، چې په سوریه کې باید په سوله‌ییزه توګه قدرت ولېږدول شي. دغه پړاو د غرب او د هغه د مزدورانو لپاره تر ټولو حساس او له خطره ډک پړاو دی، ځکه هغوی په دې لړۍ کې له هر ډول ګډوډۍ څخه وېره لري؛ خو الله سبحانه وتعالی په قرآن کریم کې فرمایي:

﴿وَيَمْكُرُونَ وَيَمْكُرُ اللهُ وَاللهُ خَيْرُ الْمَاكِرِينَ﴾ [انفال: ۳۰]

ژباړه: «او هغوی مکر او چل کاوه او الله (سبحانه وتعالی) هم مکر او تدبیر کوي، الله (سبحانه وتعالی) غوره تدبیر کوونکی دی.»

له پنځو لسیزو ډېر وخت کېږي چې د سوریې خلک د اسد رژیم د دیکتاتورۍ په سبب د وینو غوړپونه کوي او له مختلفو شکنجو څخه یې ځورېږي او دغه دردونه د دې لامل شوي چې د هغوی فکر لا ژور او غوښتنې یې نورې هم لویې شي. دوی د الهي شریعت پر بنسټ ولاړ حکومت غوښتنه کوي؛ سره له دې چې رسنۍ یې غوښتنې سانسوروي، خو د سوریې خلک دې پایلې ته رسېدلي دي، چې د غرب لخوا هره وړاندې شوې حللاره مردوده ده او د انقلابیونو په صفونو کې غږونه اوچت شوي، چې د اسلامي خلافت د تاسیس غوښتنه کوي. مسلمانان په ټوله نړۍ کې د قدس د ازادۍ او په غزه او د نړۍ په نورو برخو کې د خپلو مظلومو وروڼو د مرستې هیله لري. الله سبحانه وتعالی فرمایي:

﴿وَاللهُ غَالِبٌ عَلَى أَمْرِهِ وَلَكِنَّ أَكْثَرَ النَّاسِ لا يَعْلَمُونَ﴾ [ یوسف: ۲۱]

ژباړه: «او الله (سبحانه وتعالی) پر خپل کار برلاسی دی، خو ډېری خلک نه پوهېږي.»

لیکوال: ام احمد عساف – د فلسطین مبارکه خاوره

ژباړن: صهیب منصور