(ژباړه)

په ډيره خواشینۍ او تاسف زموږ د هېواد مسلمانانو او ټول اسلامي امت ته د حزب التحریر د یوه بل غړي د شهادت له امله د تسلیت مراتب وړاندې کوو، چې د حزب د شهیدانو په قطار کې شامل او له لوړ مقام لرونکو ملګرو سره یو ځای شو. زموږ ورور او د حزب التحریر غړی، نګمونوف ایوب خان اسماعیلوویچ، شنبه، د ډسمبر ۲مه، د نوايي ښار په ۶۴/۶۶ شمېره زندان کې شهيد شو.

زمونږ ورور ایوب خان د ۱۹۷۵م کال، د اګسټ په ۲مه نېټه زیږیدلی او د درېیو ماشومانو پلار و. د خپل ژوند ۲۴ کاله یې په ناحقه د ازبکستان په بېلابېلو زندانونو کې تېر کړل او بالاخره په نوايي ښار کې د ظلم په دغه ډنډ کې شهید شو. د نوموړي د جنازې لمونځ په ورپسې ورځ د ماسپښین تر لمانځه وروسته په علي جامع جومات کې ادا شو.

د یادولو وړ ده چې د ایوب خان وروڼه؛ یوسف، سلیمان، یونس او یعقوب جان یوازې د خپلې عقیدې له امله د خپل ژوند نیږدي شل کاله د ازبک رژیم تر استعمار لاندې په خورا سختو شرایطو کې تیر کړل. بیا هم دغه ظالم حکومت، ایوب خان ازاد نه کړ. هغه په ۱۹۹۹م کال کې د ډله یيزو نیونو په ترڅ کې په زندان محکوم شو. د ډول ډول شکنجو له زغملو وروسته یې بالاخره شهید جسد له زندانه را و ایستل شو. پر دې ادعا سربېره چې د ایوب خان د شهادت لامل تنفسي التهاب دی؛ موږ نه شو هېرولی چې د دغه حکومت اجنټانو زموږ د ډېرو وروڼو، چې په ورته شرایطو کې وو، له زخمونو ډک جسدونه د هغوی کورنیو ته وسپارل، بیا یې کورنۍ اړ ایستې چې ژر تر ژره یې خښ کړي چې د مخالفو غږونو مخه ونيسي.

ښکاره ده چې د ازبکستان رژیم د یهودي کریموف د ظالمانه او وژونکي حاکمیت پر مهال د حزب التحریر غړي بندیان او په سلګونو بندیان یې د پوښتنو ګروېږنو پر مهال شهیدان کړل یا یې هم په زندانونو کې اعدام کړل. الله سبحانه وتعالی دې د دوی شهادتونه قبول او منظور کړي! په ۲۰۱۶م کال کې د ظالم کريموف له وژل کېدو وروسته او د ميرضيايوف د حاکمیت پر مهال د حزب التحرير ګڼ شمېر شباب له زندانونو څخه خوشي شول، خو سلګونه کسان لا هم بندیان دي. د دوی محکومیت څو څو ځله تمدید شوی او په پایله کې یې ډېری تر ۲۰۳۵م کال پورې په زندانونو کې پر پاتې کېدو محکوم شوي دي. په وروستیو کلونو کې، زموږ د شبابو پر وړاندې "چاپې" وهل کېږي او د ملي امنیت چارواکي چې له زندانونو سره په اړیکه کې دي؛ امر ورکوي چې د پلان له مخې څوک باید اعدام شي؛ دوی شخصاً د دغو اعدامونو څارنه کوي. که څه هم د میرضیایوف د واکمنۍ پر مهال د دغو کرکجنو کسانو لاسونه له زندانونو را لنډ شوي وو؛ خو ظالم کریموف نور وروزل. ښايي ظالمانو زموږ وروڼه د پېړۍ یوه ربع په زندانونو کې هیر کړي وي؛ خو امت او د دوی دعوتګر وروڼه به یې هېڅکله هېر نه کړي! موږ د ازبکستان حکومت ته وریادوو چې تاسو به خامخا د اسلامي امت د زړورو کسانو، د جسدونو په اړه حساب ورکوئ، په ځانګړې توګه د حزب التحریر د شبابو په اړه چې په زندانونو کې شهيدان شوي او د هغو بندیانو په اړه چې تر اوسه بندیان دي! په دې کې هېڅ شک مه کوئ چې که خدای کول، خلافت دولت به ډېر ژر له تاسو سره محاسبه وکړي. د الله سبحانه وتعالی عذاب ډېر سخت او تریخ دی!

موږ له الله سبحانه وتعالی څخه غواړو چې زموږ ورور ایوب خان د شهیدانو له سردار حمزه بن عبدالمطلب رضی الله عنه سره حشر کړي او هغه ته د جنت الفردوس لوړې درجې ورکړي، چې د الله سبحانه و تعالی په لار کې شهیدانو سره یې وعده شوې! الله سبحانه وتعالی خو دې هغه ته جنت الفردوس او کورنۍ او دوستانو ته یې جمیل صبر ورکړي. موږ له هغوی سره خپله همدردي ښیو او په اخلاص دعا ورته کوو.[مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلاً] [احزاب: ۲۳]

ژباړه: «له مومنانو څخه ځينې داسې شخصیتونه شته چې له الله تعالی سره یې کړې ژمنه رښتیا کړې ده: له هغو څخه چا خپل نذر پوره کړ او څوک د وخت راتلو ته انتظار باسي. هغوی په خپله کړنلاره کې هېڅ بدلون رانه وستلو.»

په ازبکستان کې د حزب التحرير مطبوعاتي دفتر

۱۴۴۵ هـ.ق کال، د جمادي الاول ۱۹مه

۲۰۲۳م کال، د ډسمبر ۳مه

ژباړن: محمد حامد