د مسلمانانو د غږ خاموشولو لپاره زور او وېره ګټه نه لري. له همدې امله الله سبحانه وتعالی د داسې عقیدې بنسټ اېښی، چې زموږ روزي، ژوند او مال ټول د هغه په واک کې دي. که موږ هر څه له لاسه ورکړو، بیا هم الله سبحانه وتعالی ژوند ورکوونکی او رازق دی. رسول الله صلی الله علیه وسلم فرمایي:

«أَلَا لَا يَمْنَعَنَّ أَحَدَكُمْ رَهْبَةُ النَّاسِ أَنْ يَقُولَ بِحَقٍّ إِذَا رَآهُ أَوْ شَهِدَهُ فَإِنَّهُ لَا يُقَرِّبُ مِنْ أَجَلٍ وَلَا يُبَاعِدُ مِنْ رِزْقٍ»

[راوه احمد]

ژباړه: خلک له هغه حقیقت څخه مه وېروئ، چې دوی لیدلی او شاهدان یې دي. ځکه دا ډول وېرول نه له دوی څخه ژوند اخیستی شي او نه یې هم کمزوري کولی شي.

کله چې د الله سبحانه وتعالی قدرت وي، وېره بیا هېڅ مانا نه لري؛ ځکه الله سبحانه وتعالی په دې اړه موږ ته فرمایي: په رښتیا ویلو کې مه وېرېږئ. دغه راز رسول الله صلی الله علیه وسلم د پخوانیو پیغمبرانو په بېشمره بېلګو کې هم دا خبره روښانه کړې، چې د ظالمو چارواکو له لاسه یې ظلمونه زغملي دي. دا بېلګې د هغه رښتینو مسلمانانو لپاره ښکاره څراغونه دي، چې غواړي په اخرت کې لوی اجر تر لاسه کړي.

حزب التحریر-ولایه پاکستان

ژباړن: حبیب الله