- مطابق
![د فلسطین په جنین ښار کې وروستۍ خونړۍ پېښه](/pa/media/k2/items/cache/b038186ec492989d9c0c508951d41fd3_L.jpg?t=-62169984000)
بسم الله الرحمن الرحيم
د نبیل ابو رودینه په مشرۍ د فلسطیني ادارې یوې کمېټې بیړنۍ غونډه وکړه او په جنین کې یې د یهودي ښکېلاکګرو عاموژنه او بریدونه وغندل. یادې کمیټې له خلکو څخه د سولیز مقاومت غوښتنه وکړه او دغه راز یې د فلسطیني ادارې او یهودي دولت ترمنځ د هر راز امنیتي همغږیو د هڅو د درېدو اعلان وکړ. دغې کمېټې همدارنګه له امنیت شورا او نړیوالې جنایي محکمې څخه په دې تړاو د بیړني هدایت غوښتنه وکړه (فلسطین تلویزیون، ۲۰۲۳م کال، د جنوري ۲۶مه).
د امریکا د بهرنیو چارو وزارت پنجشنبه اعلان وکړ چې د دغه هېواد د بهرنیو چارو وزیر، انتوني بلینکن به د روانې اونۍ په پای کې مصر، «اسرایلو» او لوېدیځې غاړې ته سفر وکړي؛ دا اعلان په داسې حال کې کېږي چې امریکا په تېرو دوو لسیزو کې په لوېدیځه غاړه کې د «اسرایلو» تر ټولو خونړیو عملیاتو وروسته د تاوتریخوالي د زیاتېدو په اړه اندېښنه ښودلې. د بلینکن سفر څو اونۍ وړاندې پلان شوی و؛ خو پنجشنبه سهار په لوېدیځه غاړه کې د بې ځایه شوو پر کمپ د اسرایلو تر برید وروسته، چې د فلسطینیانو په خبره د یوې ۶۱ کلنې ښځې په ګډون نهه تنه پکې وژل شوي، داسې ښکاري چې په دغه سفر کې به پر یاد برید د بحث اړخ پیاوړی وي. اسرایلي پوځ د همغې ورځې په پای کې هم یو ۲۲ کلن فلسطینی ځوان په ډزو وواژه. (واشنګټن پوسټ، ۲۰۲۳م کال، د جنوري ۲۶مه)
د فلسطینیانو وینه ارزانه ده ... ارزانه توی شوې، ارزانه تیری پرې شوی، ارزانه يې سپکاوی شوی او ارزانه له پامه غورځول شوې. د جنین د پنجشنبې ورځې برید کې د یوې سپین سرې په ګډون نهه تنه ووژل شول او لسګونه نور ټپیان شول چې د څلورو روغتیايي وضعیت ډېر خراب دی. له دغه برید سره په دغه میاشت کې د شهیدانو شمېر ۳۰ تنو ته ورسېد. په دغه عاموژنه کې د یهودي دولت پوځ په روغتون کې اوښکې بهوونکي ګاز وکاراوه؛ پر کورنو یې بریدونه وکړل او ویې سوځول. اسرایلي پوځ، د سړک پر سر پر ولاړو موټرو ټانګونه خېژوي؛ په یوه موټر کې یو کس هم ناست و.
د شاباک (د اسرایلو د کورني امنیت اداره) غړو د «اسرایلو دفاعي ځواک» په جامه کې په رڼا ورځ په جنین کمپ کې د فلسطینیانو پر کورونو برید وکړ، کورونه یې وسوځول او ځانګړې کسان یې په نښه کړل.
له یوې خوا د مسلمانانو حکام پخپله له حساب ورکولو پرته د مسلمانانو عاموژنه کوي او له بلې خوا نړیواله ټولنه پر فلسطین د برید په وخت کې سترګو ته لاس نیسي او داسې ښيي چې ګواکي هېڅ یې نه دي لیدلي.
د فلسطیني ادارې او روغتیا وزارت غندنې څه ګټه کوي؟
له نړیوالې جنایي محکمې څخه د کوم غبرګون تمه کېږي!؟
خلک په غوسه دي؛ ښوونځیو د دغه جنایت پر وړاندې اعتصاب کړی؛ سوپرمارکېټونه او وزارتونه تړل شوي او د فلسطین په لویو ښارونو کې ناڅاپي لاریونونه وشول.
که د فلسطین خلک پریښودل شي، د اشغالګرو پر وړاندې به په ډېره زړورتیا مبارزه وکړي. که د دغو جنایتاګرو او وحشي رژیمونو سترګې او غوږونه (استخباراتي څارنه) نه وای، زموږ امت به چا له غچ اخیستو راګرځولی وای؟ په حقیقت کې، که څه هم د هغوی څېرې او نومونه زموږ پشان دي، خو له موږ څخه نه دي؛ هغوی منافقین، خاینان او اجنټان دي.
سره له دې چې د عربي رژیمونو او نورو اسلامي هېوادونو لخوا، چې د دغه ښکېلاکګر دولت د له منځه وړلو وس لري، په وار وار نهیلي شوي يو؛ خو د فلسطین د خلکو غږ ریښتینی دی او د ازادۍ دغه غږ ته باید په اسلامي پوځونو کې مخلص کسان ځواب ووایي؛ نه دا چې د امریکا بهرنیو چارو وزیر د لانجې ختمولو لپاره لوېدیځې غاړې ته راشي او پر فلسطیني ادارې غږ وکړي چې د فلسطینیانو پاڅونونه آرام کړي. له ټولو لانجو او سیاسي خبرو سره سره، دا ټولې هڅې د دې لپاره دي چې اوسنی وضعیت ارام وساتل شي او پرې نه ږدي چې نور هم کړکېچن شي، ځکه چې امریکا اوس له هغه حالت سره د مقابلې وس نه لري. که چیرې امریکا او فلسطیني اداره د دوی غوسه کمه نه کړي؛ د فلسطینانو خوځښتونه او جهادي ډلې ښايي د عمومي فضا تر اغېزې لاندې راشي اود جنین پیښې غچ واخلي.
مسلمانان اوس تر بل هر وخت ډېر خلافت ته اړتیا لري او غواړي یې، تر څو پر اسلامي امت د ښکاره بریدونو مخه ونیسي او په سپیڅلې خاوره کې دغه د سرطان دانه، یهودي دولت، له بېخه وباسي؛ له دې سره به میندې نور د خپلو بچیانو غم نه ته نه کېني.
د حزب التحریر مرکزي مطبوعاتي دفتر ته
منال بدر
۲۰۲۳م، د جنوري ۲۷مه
۱۴۴۴ هـ.ق کال د رجب ۵مه