(ژباړه)

پوښتنه:

 پوهېږو چې د امریکا بودیجه شاوخوا ۲۰ ترېلیون ډالره راټیټه شوې؛ پوښتنه دوې برخې لري:

۱ـ ایا امریکا پوروړې ده او که وي، د چا پوروړې ده؟

۲ـ که امریکا پوروړې وي، د پورونو د ورکړې لپاره ولې ډېر ډالر نه چاپوي؛ په داسې حال کې چې د امریکایي ډالر ملاتړ د طلا او نقرې په واسطه نه کېږي او امریکا پر نړۍ تپلی دی. 

ځواب:

مخکې هم دا ډول پوښتنه له موږ څخه شوې وه او ځواب مو یې د ۱۴۳۰هـ.ق کال د جمادي الاول په ۲۲مه چې د ۲۰۰۹م کال د مۍ له ۱۶مې سره سمون لري، ورکړی و. اوس یو ځل بیا همغه ځواب تکراروم:

کومه پوښتنه چې هغه وخت شوې وه، دا ډول وه: «د اقتصادي ناورین لمن لا تر اوسه پر ټوله نړۍ خوره ده او امریکا د یو شمېر هېوادونو په ځانګړې توګه د چین ډېره پوروړې ده. ایا امریکا دا توان نه لري چې ډالر ډېر چاپ کړي او د چین پور ورکړي او که د پیسو نړیوال صندوق قوانین د ډېرو ډالرو چاپولو اجازه نه ورکوي؟»

ورکړل شوی ځواب دا ډول و: «بېشکه امریکا د ډېرو پیسو د چاپ توان لري او دا کار د پیسو د نړیوال صندوق له توافق وروسته کولی شي. دا کار د دغه صندوق له توافق پرته هم په پټه او هم په ښکاره کولی شي؛ ځکه د دغه صندوق عملي او اصلي واک د امریکا په لاس کې دی او په خپلو دروغجنو پلمو سره یې واقعیت پټولی شي، ترڅو صندوق یې تایید کړي. ستونزه دا ده چې د ډېرو نغدو پیسو په چاپ سره د ډالر ارزښت ټیټېږي او په پایله کې د ډېر تورم (د قېمتونو لوړېدو) لامل کېږي او همدا دلیل دی چې امریکا له هغو حالاتو پرته چې ډېره ګټه پکې وي، داسې کارونو ته لاس نه اوږدوي.

د بېلګې په توګه: رسنیو اعلان کړه چې د نفتي فشارو په جریان کې چې د یوې بوشکې نفتو بیه تر ۱۵۰ ډالرو ته لوړه شوه، امریکا له ۲ تر ۴ تریلیونه ډالر چاپ کړل او امریکا له دغو فشارونو لرې نه وه. امریکا ځکه دومره پیسې چاپ کړې، چې په مستقیم او غیر مستقیم ډول زیات نفت وپېري او ذخیره کړي. امریکا په دې کار یعنې د قېمتونو په لوړېدو او د ډالر د ارزښت په ټیټېدو کې لویه ګټه لیدلې وه، خو د دغه ناورین له سختېدو سره یې هممهاله د زیات ډالر له چاپولو لاس واخیست؛ ځکه د امریکا بازارونو د ډېری شرکتونو د سقوط او د پورونو د ډېرېدو، د تولید او لګښت د کمېدو له امله نور د زیات تورم توان نه درلود.  

امریکا اوسمهال له مخ پر ودې اقتصادي بدیل پرته ډېرې پیسې نشي چاپولی او دا تګلاره ښایي د یوه ټاکلې وخت لپاره دوام پیدا کړي.

خو واقعیت دا دی که امریکا هر وخت له بدیل پرته د ډېرو پیسو په چاپ کې خپله ګټه وویني، په چټکۍ سره دا کار کوي؛ ځکه یوازنی دولت دی چې پولي واحد یې په پراخه توګه د نورو دولتونو پر ذخایرو واک لري او د دې تر څنګ د پیسو د نړیوال صندوق عملي نفوذ هم په واک کې لري. پر دغه اساس که امریکا اوسمهال د پورونو د ورکړې لپاره زیات ډالر چاپ کړي، په لاندې دوو دلایلو سره به امکان ونه لري:

اول: د ډالر ارزښت را لوېږي؛ ځکه په هره اندازه چې عرضه شوی ډالر زیات شي، په همغه کچه یې ارزښت ټیټېږي او دا کار ښايي د پوروړي او د پور د خاوند تر منځ ستونزه رامنځته کړي. په داسې حال کې د چې د پور خاوند د چین په څېر یو لوی هېواد وي، بېشکه چې دا کار به د دواړو هېوادونو تر منځ په اقتصادي اړیکو منفي اغېز ولري او په پایله کې به د امریکا اقتصادي ناورین نور هم پراخ شي. په ځانګړې توګه دې ته په پام سره چې امریکا او اروپا له چین څخه غواړي، ترڅو د روان اقتصادي ناورین په حل کې برخه واخلي، نه دا چې ځان ترې ګوښه کړي.

دویم: له اقتصادي بدیل پرته د نغدو پیسو ډېرېدل ښايي په امریکا کې د توکو د بیو د لوړېدو لامل شي او دا هغه څه دي چې د امریکا اقتصادي بازارونه یې نور نشي زغملی. 

پورتنیو دلایلو ته په پام سره، امریکا ښايي له مخ پر ودې اقتصادي بدیل پرته ډېرې نغدې پیسې چاپ نه کړي؛ خو دا حالت ښایي په نژدې راتلونکي کې په لږه کچه صدق وکړي.

خو لکه څنګه چې پورته ورته اشاره وشوه، په دا ډول کار لاس پورې کول هم احتمال لري، ځکه که امریکا د ډېرو نغدو پیسو په چاپولو کې خپله زیاته سیاسي او اقتصادي ګټه وویني، دا کار به بې له شکه وکړي، ځکه هم یې پولي واحد د ډېری هېوادونو پر ذخایرو واکمن دی او هم خپله د پیسو پر نړیوال صندوق واک لري. ۱۴۳۰هـ. ق، د جمادي الاول ۲۲مه چې د ۲۰۰۹م، د مۍ له ۱۶مې سره سمون لري.» دغه ځواب چې د پورتنۍ پوښتنې لپاره وړاندې شوی و، ښايي ستاسو د پوښتنې لپاره به هم کافي وي.

ژباړن: منصور درځ

(ژباړه)

د اسلامي هېوادونو د حاکمو رژیمونو پر هڅو سربېره، چې له غاصب دښمن (یهودي دولت) سره د جګړې د پای ته رسولو لپاره یې د دوستانه اړیکو جوړولو او حالاتو عادي کولو لپاره دا ډول تړونونه کړي، خو دغه دولت لا هم د مسلمانانو او ظالم یهودي دولت ترمنځ پر دوښمنۍ ټینګار کوي. دا په هر ځای کې له ټولو مشهورو لاریونونو او پېښو څخه په ډاګه شوې، چې دغه دولت تل د فلسطین یا هم د اردن پر خلکو سخت ظلمونه کړي او دا هم په ډاګه شوې چې د اردن رژیم تل دغه اشغالګر دښمن ته د دا ډول کرغېړنو تړونو له امله سر ټیټ او چاپلوسي کړې.

هغه خوځښتونه چې د الباقوره او الغمر د اجارې او د ګاز د تړون پر وړاندې رامنځته شول، چې لا هم دوام لري، د اردن د رژیم او امت تر منځه د واټن ښکارندویي کوي. د دې تر څنګ د امت ښېګنه را په ګوته کوي، هغه دا چې د دغه امت بچیان هڅه کوي چې له دښمن سره د دغه تړون د نه منلو په وسیله په خپله خاوره کې د دغه ګاز نل‌لیکې د غزولو مخنیوی وکړي.

د عربو وادي له شرمه ډک او کرغېړن تړون، چې د اردن رژیم او یهودي دولت تر منځ شوی و، د هغو تړونو لپاره دروازه پرانیسته چې  پر مټ یې د یهودو دولت د امنیت او اقتصاد په برخه کې ځان بسیاینې ته ورسېد، لکه د بحرین د کانال تړون، عام ازاد زون تړون او د اورګاډي د پټلۍ تړون. له دې تړونو لږ را وروسته اوس د ګاز تړون، سره له دې چې په اردن کې ټولې هڅې او خوځښتونه د دغه تړون پر ضد وو، خو بیا هم د اردن رژیم دا تړون لاسلیک کړ. دا ټوله د عربو وادي تړون ثمره وه. د دولت ویاندې جمانه غنیمات په خپله یوه مقاله کې د ۲۰۱۴م د نومبر په ۹ مه، هغه مهال چې په حکومت کې دنده نه ترسره کوله، لیکلي وو: «حکومت دا هېروي چې دغه اشغالګر دولت، مخکینیو تړونونو ته په ځانګړې توګه د عربو وادي تړون ته چې د ګاز له تړون څخه خورا مهم و، درناوی ونه کړ. هغو چې ویل یې، اسرائیل له خپلو هوکړو تېښته کوي او تړونو ته درناوی نه کوي، ایا د ګاز دغه تړون ته به وفادار پاتې شي، چې د اردن اقتصاد په ستراتېژیکه توګه له دوښمن سره نښلوي.» نو ایا د حکومت د ویاندې لپاره چې کله یې په حکومت کې دنده تر لاسه کړه، وضعیت بدلون وکړ، چې خپلې خبرې یې بدلې کړې؟

د اردن خلکو او کارپوهانو د دغه لوټ شوي ګاز د واردولو د تړون د اقتصادي شونتیا او د اردن خلکو ته یې د ګټې په اړه وړاندیز کړی و. دوی دا ګاز د اردن لپاره د برېښنا د اړتیا په برخه یو ستر بدیل بللی و، چې کولی شو په ډېره ټیټه بیه د برېښنا، لمریزې برېښنا او د رشا له ګازه څخه بډایه ځمکې لپاره او د تیلو د څاګانو په برخه کې ترې ګټه پورته کړي او اردن د نړۍ په سترو زېرمو کې حساب او د مایع ګاز برخه یې وګرځوي. وروستی بدیل دا و چې له مصر څخه وارداتو ته ور وګرځي، چې د مصر تازه زېرمې په روان کال کې هره ورځ ۶ میلیارده فوټه مربع ته رسیږي. د اردن رژیم دا ټول بدیلونه پر ځمکه وویشتل او د هغه امت د غوښتنې خلاف کړنه یې تر سره کړه چې یهودي دولت نه غواړي.

دا ځکه چې دغه رژیم غواړي، یهودي دولت ځواکمن او اردن په ضعیف حالت کې وساتي، نو د دوی دندې دا نه ایجابوي چې د دښمن پر وړاندې یا د امت د دښمنانو پر وړاندې څه کار وکړي. په دې توګه د لس میلیارده امریکایي ډالرو په ارزښت د ګاز دا معامله یهودو ته وړتیا ورکوي چې د نوي ليفياثان (Leviathan) سیمه پانګونه وکړي او ګاز یې صادرولو ته چمتو کړي او دا ستراتیژیک اهمیت به د دې سبب شي چې اردن د دغه غاصب دولت له لوري یرغمل شي. ډېره اړینه خبره خو دا ده چې د قانون له مخې له یو اشغالګر دولت سره د دا ډول تړونونو پر مخنیوي سربېره د امت او د اردن د خلکو وقار بې ارزښته کوي.

د فلسطین موضوع د هغه ملت موضوع ده چې خپله مبارکه ځمکه یې اشغال شوې. دغې موضوع ته باید د عقیدې او شریعت پر بنسټ له ځانګړې اسلامي زاویې وکتل شي. دا هغه اسلامي خاوره ده چې الاقصی جومات ته یې په خپله غېږه کې ځای ورکړی او د رسول الله صلی الله علیه وسلم د معراج بنسټ پکې اېښودل شوی. دا خاوره یهودو د خپل حرامي دولت پر تاسیسولو او د غرب په لاس رامنځته شوو عربي رژیمونو په مرسته اشغال کړل شوه. د دې خاورې ازادي په روغه جوړه، سرټیټونې، حالاتو عادي کولو او د یهودي دولت په ساتلو نه شي تر لاسه کېدی. دا ازادي په دې نه تر لاسه کیږي چې دا اشغالګر دولت پر خپل هېواد او خلکو برلاسی کړل شي او د دغه غاصب دولت د ساتلو لپاره د خپل هېواد دارایي له منځه یوړل شي. دا ازادي د دغه دولت په رېښو اېستلو، چې د ټول امت ارزو ده، تر لاسه کېدلی شي. د الله سبحانه وتعالی د رضا لپاره د جهاد او هغو پوځونو په وسیله تر لاسه کېدلی شي، چې رژیمونه یې د خپلې ساتنې لپاره کاروي. دا ټول هغه څه دي چې له رژیم څخه د وادي عربه د تړون او دې ته ورته نورو تړونونو د لغوه کولو او نورو کرغړنو تړونونو د مخنیوی غوښتنه کوي، په دې ډول به د یهودي دولت سره دښمني تر مادي توانایي پورې ادامه پیدا کړي، تر څو ټولې اشغال شوې سیمې ازادې کړل شي. رژیم ته د ګاز تړون په لغوه کولو سره هیڅ زیان نه رسیږي، کېدی شي چې تړون لغوه کړي، لکه څرنګه یې چې د الباقوره او الغمر د اجارې تړون له منځه یووړ، تر څو لنډ مهاله رضایت تر لاسه کړي، خو امت په دې ښه پوهیږي چې د دوی سترګو کې خاورې اچوي. امت پوهېږي چې له یهودي دولت سره له جګړې پرته بله لاره نه تر سترګږ کېږي، د دې لپاره بله چاره نشته، پرته له دې چې د رسول الله صلی الله علیه وسلم په کړنلاره د راشده خلافت په تاسیسولو سره بیا په اسلامي طریقې سره ژوند ته ورونه ګرځو. هغه خلافت چې په شریعي طریقه به د امت ساتنه کوي او هېواد او وګړي به یې د دښمن له دسیسو څخه ژغوري او امت به د یهودي دولت د له منځه وړلو په لور رهبري کوي.

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللّهِ حُكْماً لِّقَوْمٍ يُوقِنُونَ﴾ [مائده:۵۰]

ایا دوی له تا څخه د جاهلیت حکم غواړي!؟ د هغو کسانو لپاره چې یقین لري، تر الله سبحانه وتعالی څوک ښه حکم کوي!؟

د حزب التحریر-ولایه اردن مطبوعاتي دفتر

۱۴۴۰هـ.ق، د ربیع الاول ۱۳مه، چهارشنبه/ ۲۰۱۸م، د نومبر ۲۱مه