په مالیزیا کې د ډاکټر ذاکر نایک موضوع د ډېرو بدلونونو لامل شوه، چې ټول لوړ پوړي ملي او سیاسي مشران، مسلمان او نامسلمان لکه: پولیس، غیر دولتي سازمانونه، مفتیان، روښنفکران، لېبرالیسټان او په ټوله کې عام خلک د دغه نامتو دعوتګر په اړه یو له بل سره خبرې کوي. دغه موضوع هغه وخت رابرسېره شوه، چې د ۲۰۱۹l کال د اګېسټ په ۱۰مه په کالانتان ښار کې د ډاکټر ذاکر نایک خبرو په مالیزیا کې د مېشتو چینایانو او هندیانو احساسات راوپارول. پاکتن هارپن او ډېرو نورو سیاسي ګوندونو پر حکومت فشار راوړ، چې ډاکټر ذاکر نایک بېرته خپل هېواد هندوستان ته ولېږي، چې د جنایي تورونو لپاره هلته بلل کېږي. ډاکټر ذاکر نایک څو ځله په ډاګه ویلي، چې د ده له وینا څخه ناسم پوهای شوی. له هغو خلکو څخه چې د ده له وینا څخه یې د نارامۍ احساس کړی، په عمومي توګه بښنه غوښتې. خو اوس هم نوموړی دعوتګر د ماليزیا څخه وتلو ته اړ ایستل کېږي، په تېره بیا د نامسلمانو او ليبرالیسټان له لورې چې کرکه ورسره لري. د مالیزیا لومړی وزیر ډاکټر محاضر بن محمد خپله هم د هغو کسانو د فشار له امله له ورایه وارخطا ښکارېد، چې د ډاکټر ذاکر نایک ایستل یې غوښتل. تر دې چې نږدې و خپل ذهن بدل کړ، څو ډاکټر ذاکر نایک له خپل هېواد څخه وباسي. نږدې یوه میاشت وروسته خبرې اترې پای ته ورسېدې. محاضر بلاخره پرېکړه وکړه چې ډاکټر ذاکر نایک به بېرته نه لېږي؛ خو نوموړي دعوتګر ته نوره اجازه نه ورکول کېږي، چې د مالیزیا په ټولو ایالتونو کې خبرې وکړي.
له دې څخه چې ښايي ډاکټر ذاکر نایک په خپله وینا کې تېروتنه کړې وي، انکار نه کوي. کوم شی چې ډېر بد دي هغه دا چې ځینې خلک له دې موضوع ناوړه ګټه اخلي او اور ته لمن وهي چې ډاکټر ذاکر نایک خپل هېواد ته ولېږي. که چېرې د ډاکټر ذاکر نایک وروستۍ خبرې په مالیزیا کې د ډېرو سیاسي او سازماني مشرانو له تبعیضي خبرو سره پرتله شي دومره خطرناکې نه دي. لنډه دا چې په مالیزیا کې خپله خلک د تبعیض او تعصب اور ته لمن وهي او تر اوسه په دې هېواد کې د تبعیض اور نه دی سوړ شوی. له همدې امله د ډاکټر ذاکر نایک موضوع دومره ستره نه ده، څومره چې ښکاره ګوندونو ترې ستره موضوع جوړه کړې. پرته له دې چې ژور فکر وکړو، موږ پوهېږو چې د ډاکټر ذاکر نایک دوښمنان، یا نامسلمانان یا هم لیبرالیسټان، چې له مالیزیا څخه د ډاکټر ذاکر نایک شړلو ته لېواله دي، دلیل یې د هغه مفکورې دي، چې د دوی هېڅ نه خوښېږي. ډېری ګوندونه، خپله د دیني چارو مسول وزیر د ډاکټر ذاکر نایک د دعوت بڼه په مالیزیا کې د دینونو د پرتله کولو پر اساس سمه نه بولي، ځکه چې دا هېواد له ډېرو ټولنو څخه جوړ شوی دی.
په دې اړه، موږ حزب التحریر- ولایه مالیزیا غواړو ووایو:
۱) ډاکټر ذاکر نایک یو له زرګونو دعوتګرانو څخه دی، چې باید د داسې حکومت د ساتونکو له خوا وساتل شي، چې د اسلامي حکومت دعوا کوي. ایا هغه په خپلو خبرو کې تېروتنه کړې؟ که داسې وي هغه یوازې یوه تېروتنه ده چې باید تصحیح شي. تېروتنه د دې لامل نه شي، چې هغه له هېواده بهر وایستل شي. د مسلمانانو له لوري نامسلمانانو ته وسپارل شي (چې د هغوی له لوري ورسره بې انصافي وشي یا هم ووژل شي) چې دا کار حرام دی. لکه چې پیغمبر صلی الله علیه وسلم فرمایي:
«الْمُسْلِمُ أَخُو الْمُسْلِمِ، لاَ يَظْلِمُهُ وَلاَ يُسْلِمُهُ»
(البخاري)
ژباړه: یو مسلمان د بل مسلمان ورور دی، نه ظلم پرې کوي او نه یې ظالم ته سپاري.
۲) د حکومت له لوري ډاکټر ذاکر نایک ته د دایمي اوسېدو حق ورکړل شوی. دغه حق یوازې باید له ډاکټر ذاکر نایک څخه وانه خیستل شي، بلکې له هغو مسلمانانو څخه هم وانه خیستل شي چې ځانونو ته یې په مالیزیا کې خوندي ځای پیدا کړی. د ډاکټر ذاکر نایک په پرتله ډېر نور مسلمانان ساتنې ته اړتیا لري، لکه د روهینګا، سین کیانګ، بنګله دیش، اندونیزیا، صیام، سوریه، فلسطین مسلمانان او هغه کسان چې په خپل هېواد کې د سیاسي نارامۍ او ظالمو چارواکو له لوري اړ شوي، چې مالیزیا ته راوتښتي. هغه که ډاکټر ذاکر نایک یا هم نور مسلمانان وي. هغه کسان چې ساتنې ته اړتیا لري او غواړي په دغه هېواد کې واوسي، بیا نو په حکومت واجب ده چې د دوی مرسته او ساتنه وکړي، دوی باید لکه څنګه چې اسلام غواړي د قانوني اوسېدونکو په توګه ومنل شي. پیغمبر صلی الله علیه وسلم او خلفا راشدینو هغو مسلمانانو ته چې غوښتل یې په اسلامي هېوادونو کې واوسېږي ښه راغلاست ویل او ټول د مهاجرینو نه، بلکې د اتباعو په توګه منل کېدل. ځکه چې ټول اسلامي هېوادونه په مسلمانانو پورې اړه لري، اسلامي خاورې په ځانګړو توکمي او نژادي ډلو پورې نه دي تړل شوې، هر مسلمان په دغو هېوادونو کې چېرې یې چې زړه وي، اوسېدلی شي.
۳) اسلام نه یوازې مسلمانانو ته، بلکې د نامسلمانو پر مخ هم چې غواړي اسلامي هېوادونو ته راشي، خپلې دروازې پرانیستې دي. اسلام حتا په خپل هېواد کې حربي کافر ته هم تر یو کال پورې د اوسېدو اجازه ورکوي او که وغواړي له یو کال څخه ډېر پاتې شي، نو بیا باید جزیه ورکړي او دوی د یوه تړون مستحق او هېواد اتباع ګرځي، چې کافر ذمي بلل کېږي. اسلام تر ۱۳ پېړیو ډېر پر نړۍ واکمني کړې او د خلکو تر منځ یې تر هغې پورې عدالت ټينګ او ویاړ په برخه کړی، چې تر اسلامي قوانینو لاندې یې ژوند کاوه. په دغه حالت کې هم مسلمانان او هم نامسلمانان شامل وو.
۴) هر دعوتګر چې له تاوتریخوالي پرته له روښنفکرو لارو چارو کار اخلي، پر حقیقت ولاړې او معقولې خبرې کوي، باید د کوم ګوند له لوري بندي نه شي. له خبرو سره باید په خبرو جګړه وشي، نه په زور او ځواک سره. عقیده باید په خبرو سره ثابته شي او دین باید د خبرو او مفکورې له لارې عملي شي. بد بختانه، یو څو ګوندونه چې له روښنکفرانه لارو چارو څخه کار نه شي اخیستی، تعصب ته لمن وهي او د دوی له امله دا جنجال رامنځته کیږي، نه د دعوتګر له امله. که دوی ځان ته روښنفکران وایي باید له خبرو سره یې په خبرو جګړه کړې وای، نه دا چې له هغه سره نژادي تبعیض او د تابعیت د موضوعاتو په اړه جګړه وکړي. همداسې، حکومت باید مناظرې او خبرو اترو ته لاره هواره کړي، چې حقیقت ښکاره شي، نه دا چې له زور څخه کار واخلي، دعوت وځپي او یا یې د اسلام مخلافینو ته وسپاري.
له ډېرو کلونو راهیسې د دینونو تر منځ د ګډو فکرونو موندلو موضوع یا د مذاکرې او خبرې اترو لپاره عام ځایونه د حکومت له لوري د ساعت تېرۍ په ځایونو بدل کړې دي او د ځانګړو ډلو پر یوه اجنډا اوښتې. له شک پرته، دغه مفکوره له کفر ـ لويديځ څخه راغلې چې غواړي د اسلامي عقيدې ريښې له بېخ څخه وباسي او له امت څخه غواړي چې ټول دینونه ومني او دوی ته ووایي، چې یوازې د اسلام دین حقیقي نه دی. دا هغه څه دي چې لويدیځ يې د پلي کېدو پلان لري. له بده مرغه د پلورلېزم مفکوره د مسلمانو مشرانو، نامتو او عادي پوهانو له لوري منل شوې ده. نامسلمانان او لیبرالیسټان چې د مفکورې له مخې له ماتې سره مخ دي، دغه حقیت نه مني چې د دوی دین او عقیدې ناسمې دي او اسلام یوازینی حقیقي دین دی. د دیني حساسیت تر پلمې لاندې د چارواکو له خوا د دعوت د کاروان مخه نیول کېږي. له شک پرته، د ډاکټر ذاکر نایک او ډېری نور دعوتګران یوازې د اسلامي عقیدې حقیقت او د کفري عقیدو خرافات بیانوي. دا کار د مفکورې رسولو له لارې کیږي، نه د سپکاوي له لارې، په داسې حال کې چې تاوتریخوالی خو لا ډېره لرې خبره ده. داسې ښکاري چې په مالیزیا کې مسلمانان نه یوازې د لیبرالیزم او پلورلیزم مفکورو له لارې تر تهدید لاندې دي، بلکې په نوي حکومت کې دوی په ښکاره توګه دغې مفکورې ته په ليوالتیا سره لار هواروي!
عبدالحکیم عثمان
په مالیزیا کې د حزب التحریر مطبوعاتي ویاند